Weather (state,county)

Basti Mein Dewane Aiye



                                               بستی میں دیوانے آئے

بستی میں دیوانے آئے

چھب اپنی دکھلانے آئے

دیکھ ترے درشن کے لو بھی

کر کے لاکھ بہانے آئے

پیت کی ریت نبھانی مشکل

پیت کی ریت نبھانے آئے

اٹھ اور کھول جھروکا گوری

سب اپنے بیگانے آئے

پیر، پروہت، ملا، مکھیا

بستی کے سب سیانے آئے

طعنے، معنے، اینٹیں پتھر

ساتھ لیے نذرانے آئے

سب تجھ کو سمجھانے والے

آج انہیں سمجھانے آئے

اب لوگوں سے کیسی چوری؟

اٹھ اور کھول جھروکا گوری

درشن کی برکھا برسا دے

ان پیاسوں کی پیاس بجھا دے

اور کسی کے دوار نہ جاویں

یہ جو انشا جی کہلا دیں

تجھ کو کھو کر دنیا کھوئے

ہم سے پوچھو کتنا روئے

جگ کے ہوں دھتکارے ساجن

تیرے تو ہی پیارے ساجن

گوری رو کے لاکھ زمانہ

ان کو آنکھوں میں بٹھلانا

بجھتی جوگ جگانے والے

اینٹیں پتھر کھانے والے

اپنے نام کو رسوا کر کے

تیرا نام چھپانے والے

سب کچھ بوجھے، سب کچھ جانے

انجانے بن جانے والے

تجھ سے جی کی بات کہیں کیا

اپنے سے شرمانے والے

کر کے لاکھ بہانے آئے

جوگی الکھ جگانے والے



دیکھ نہ ٹوٹے پیت کی ڈوری

اٹھ اور کھول جھروکا گوری
Powered by Blogger.